പേക്രോം - പി പി രാമചന്ദ്രന്റെ കവിതകൾ

പി. പി രാമചന്ദ്രനെക്കുറിച്ച് 

1

ഒച്ചിലും മച്ചിലും കവിത. 
തൂണിലും തുരുമ്പിലും കവിത. 
വാക്കിലും നോക്കിലും കവിത. 
മീനുകൾ തല വെട്ടി-
തിരിയുന്ന വേഗത്തിൽ, 
കവിതകൾ കാണുന്ന പി.പി. 
ഒച്ചിലും മച്ചിലും കവിത. 
തൂണിലും തുരുമ്പിലും കവിത.
വാക്കിലും നോക്കിലും കവിത. 

2 

കലർപ്പിൽ കലരുന്ന, 
നിറങ്ങളെയൊക്കെയും 
മഴവില്ലിൽ 
കാണുന്ന കവിത. 
ജാഥയിൽ കവിത, 
അണുവിലും കവിത. 
വഴി മാറി നടക്കുവാൻ 
മോഹിക്കും കവിതകൾ
വഴിയായി മാറിയ കവിത.

മീനുകൾ തല വെട്ടി-
തിരിയുന്ന വേഗത്തിൽ, 
കവിതകൾ കാണുന്ന പി.പി. 

മീനുകൾ തല വെട്ടി-
തിരിയുന്ന വേഗത്തിൽ, 

കവിതകൾ കാണുന്ന പി.പി. 

പേക്രോം - കവിതാ സമാഹാരം 

കവി പി . പി. രാമചന്ദ്രൻ നിരവധി കവിതാ ഗ്രന്ഥങ്ങൾ എഴുതിയിട്ടുണ്ടെങ്കിലും ഞാൻ വായിക്കുന്നത് അടുത്തകാലത്താണ്. 2025-ൽ പുറത്തിറങ്ങിയ പേക്രോം എന്ന 46 കവിതകൾ ഉൾപ്പെടുന്ന കവിതാ സമാഹാരം. കുളിമുറിച്ചുവരിലെ ഒച്ചിൽ കവിത കണ്ടെത്തുന്ന പി.പി; ഞാനാണെങ്കിൽ അൽപ്പം അറപ്പോടെ മാറി പോകും. തൂണിലും തുരുമ്പിലും ദൈവമുണ്ടെന്ന് ദൈവവിശ്വാസികൾ പറയാറുണ്ട്. അതുപോലെയാണ് പി.പി രാമചന്ദ്രന്റെ കവിതകൾ. തൂണിലും തുരുമ്പിലും കല്ലിലും പുല്ലിലും തുടങ്ങി തനിക്ക് ചുറ്റുമുള്ള ഓരോ അണുവിലും കവിത കണ്ടെത്തുന്ന പ്രതിഭാശാലി. ഒരു സൈക്കിൾ കാണുമ്പോൾ അതിന്റെ ചക്രത്തിലേയ്ക്ക് നോക്കുമ്പോൾ ചിലന്തികൾ നൂല് പാകിയ ചക്രങ്ങൾ എന്ന് വിശേഷിപ്പിക്കുന്ന ഭാവന. അക്വേറിയത്തിലെ മീൻ ഏത് ദിശയിലേയ്ക്ക് തല വെട്ടിക്കുമെന്ന് പ്രവചിക്കാനാവാത്തതിലെ വിസ്മയം നിരീക്ഷിക്കുന്ന മനസ്സ്. ഓരോ അക്ഷരത്തിലും കവിത കണ്ടെത്തുന്ന ശൈലി. കലർപ്പ് എന്ന കവിതയിൽ എല്ലാം കലർന്ന ലോകത്തെ ജലമെന്ന ഉപമയിൽ തുടങ്ങി മഴവില്ലിൽ എത്തിച്ചുകൊണ്ടുള്ള കാഴ്ച. കുഴിവെട്ടുന്നവരോട് എന്ന കവിതയിൽ പറയുന്നു, ചെരിപ്പിന്റെ പാകത്തിൽ ചെത്തണം കാല് എന്ന വരിയിൽ തുടങ്ങി കുഴിക്കൊത്ത പെട്ടി അതിനൊത്ത വ്യക്തി നടക്കരുതാരും നാട്ടു നടപ്പിനെത്തെറ്റി എന്ന വാക്കുകളിൽ എത്തുമ്പോൾ വഴി മാറി നടക്കാൻ മടിക്കുന്ന മനുഷ്യ മനസിനെ കണ്ണാടിയിൽ പ്രതിഫലിപ്പിക്കുന്നു. വിപരീധോക്തിയെ എത്ര മനോഹരമായിട്ടാണ് പി.പി കവിതയിൽ ഉപയോഗിച്ചിരിക്കുന്നത്.

അവസാന കവിതയിൽ എത്തുമ്പോൾ വിനയത്തോടെ പേക്രോം എന്ന തവളയെന്ന് ചൊല്ലി അവസാനിപ്പിക്കുന്നു. ഈ കവിതകൾ പൊട്ടകുളത്തിൽ വീണ കലയല്ലെന്ന് എനിക്ക് പറയുവാൻ കഴിയും. നദിയായി ഒഴുകുന്നവ. വെള്ള മേഘമായി ആകാശത്തിൽ പറക്കുന്നവ. വഴിമാറി നടക്കുന്ന കവിതകൾ തന്നെയാണ് പി.പി രാമചന്ദ്രന്റെ  ഓരോ കവിതകളും. മീൻ തല വെട്ടിക്കുന്നത് എങ്ങോട്ടായിരിക്കുമെന്ന് പ്രവചിക്കുക അസാധ്യമെന്ന് അദ്ദേഹം തന്നെ എഴുതിയ പോലെ വ്യത്യസ്തം. അതുകൊണ്ട് തന്നെ, ഇത് വെറും പേക്രോം അല്ല.